村屋業主經常收到宣傳單張，推介安裝太陽能板賺取高回報。但對業主們而言，最難決定的是應該找誰來安裝。
聰明的業主會問判頭以下三條問題：
- 點樣可以保證賺錢？
- 點裝先合法？
- 裝完點保養？
但可以從這三條問題分辨到好壞判頭才是真高手！
保 證 賺 錢
😈「只要裝好，電力公司一批，每個月就可以穩賺」
😈「你個天台可以裝6千瓦，每年6千度電，以$5一度，一年收 $3萬，收足15年」
聽落好似好清楚，但好判頭會交代得更清楚：
👼🏻「只要裝好，電力公司檢查完成掛好錶，電力公司就可以按每月發電量付錢。當然業主都要按法例向機電工程署和地政署登記、申請商業登記和做定期保養，先可以保證穩妥啦。」
👼🏻「你個天台可以安裝，一共20塊太陽能板， 約6千瓦嘅系統。 參考電力公司數據，一年預計收到$3萬，詳細可以上電力公司網址或機電工程署網址核對。」
合 法 安 裝
😈「冇問題，我哋採用嘅支架好足料，十號風球都吹唔郁，而且太陽能板同其他設備都有證書，保證安全。」
以上這種似是而非的答案，相信大家亦不會接受。
👼🏻「我哋會協助業主向各政府部門同電力公司申請及登記，呢度有一份清單，列出需要申請嘅牌照同埋所須文件，與及負責今次工程嘅註冊電業工程人員和註冊結構工程師嘅資料，佢哋除咗會幫手確保系統安全合法之外，如果過程中有疑問，歡迎隨時聯絡。」
保 養 安 排
😈「太陽能板打理好方便，靠落雨就可以清洗，而且廠家有20年保養，業主可以放心。」
真係可以放心？當然不能啦！
👼🏻「按照法例，呢個系統須要向機電工程署登記，並且要委託註冊電業承辦商進行每年檢查。平日亦要留意太陽能板同其他設備有冇損壞，如果太陽能板污糟，可以用清水同布清潔，但係清潔時一定要注要安全。如果發現有損毀，即刻熄掣，然後搵合資格人仕進行檢查同維修。詳細嘅保養方法，我哋會响安裝好之後教你點做，仲會有本保養手冊畀你參考。」
判頭易找，好判頭難尋！最後提醒各業主，不要貪方便或單憑價錢去選擇判頭，要貨比三家，多聽多問，斤斤計較，才能有保障！
香港可再生資訊平台仝人 祝大家在新一年 身體健康 財源廣進